ஹாலிவுட்டிலிருந்து மிக அபூர்வமான படங்கள் எல்லாம் வந்திருக்கின்றன. 70களில் இருந்த நார்மா ரே என்ற தொழிற்சங்கத் தலைவர் பற்றிய Norma Rae என்ற படத்தைப் பற்றிய இந்தக் கட்டுரையைப் பார்த்தால் ஹாலிவுட்டில் தொழிலாளர் பிரச்சினைகளுக்கும் இடமிருக்கிறதா என்று ஆச்சரியமாக இருக்கிறது.
ஹிட்லரின் மனைவியான ஈவா பிராவ்ன், கணவருடன் தற்கொலை செய்துகொள்வதற்கு முன் அவரைத் திருமணம் செய்துகொண்டார்.
ஹிட்லரின் வெறித்தனத்திற்கு அவரது ‘மாரல் சப்போர்ட்’ இருந்ததா?
‘The Lost Life of Eva Braun’ என்ற ஈவா பிராவ்னின் வாழ்க்கை வரலாற்றுப் புத்தகத்திற்கு வாஷிங்டன் போஸ்ட்டின் மதிப்புரை.
இது எஸ். ஆனந்த் என்பவர் எழுதிய பழைய கட்டுரை. ஆனால் இதில் இவர் அழுத்தமாகவும் அமர்க்களமாகவும் எடுத்துச் சொல்லும் விஷயங்கள் நீண்ட காலம் நிற்கும்.
அசுதோஷ் கோவாரிகர் இயக்கத்தில் ஆமீர் கான் நடித்த ‘லகான்’ படத்தின் விமர்சனம் போலவும் பொதுவாக கிரிக்கெட்டின் ஜாதி அரசியல் பற்றியும் எழுதப்பட்ட மிக நீண்ட கட்டுரை. ஆனந்த் அவுட்லுக் பத்திரிகையில் வேலை பார்க்கிறார்.
கட்டுரையில் ஆங்காங்கே பல சாட்டையடிகளைப் பார்க்கலாம். உதாரணமாக -
A ‘liberal-secular’ newspaper which has no qualms calling itself The Hindu…
Just brilliant!
உண்மையான பாதை
நினாகாவா காலமாவதற்குச் சற்று முன்பு ஜென் ஆசிரியர் இக்கியு அவரைப் பார்க்க வந்தார். “உங்களை நான் அழைத்துப் போகவா?” என்று கேட்டார் இக்கியு.
“நான் இங்கு தனியாகத்தான் வந்தேன், தனியாகத்தான் போகிறேன். உங்களால் எனக்கு என்ன பயன்?” என்று கேட்டார் நினாகாவா.
அதற்கு இக்கியு இவ்வாறு பதிலளித்தார்: “நீங்கள் நிஜமாகவே வந்துகொண்டும் போய்க்கொண்டும் இருப்பதாக நினைக்கிறீர்கள் என்றால் அது உங்கள் பிரமை. வருவதும் போவதும் இல்லாத பாதையை நான் உங்களுக்குக் காட்டுகிறேன்.”
இக்கியு இந்தச் சொற்களால் பாதையை மிகத் தெளிவாகக் காண்பிக்கவே, நினாகாவா புன்னகைத்து இறந்தார்.
- - -
பாக்கி நூறு இங்கே.
இரவுக் கழுகு, காமிக்ஸ் சாகச நாயகன் டெக்ஸ் வில்லரின் பட்டப் பெயர். லயன், முத்து காமிக்ஸ் புத்தகங்களில் தோன்றி ஆயிரக்கணக்கானோரின் இளமைப் பருவத்தை வளப்படுத்திய கௌபாய் டெக்ஸ் வில்லர்.
அப்பேர்ப்பட்டதோர் நாயகனின் பெயரைத் தாங்கி வந்திருக்கிறது ஒரு வலைப்பதிவு. காமிக்ஸ் படிப்பவர்களுக்கும் தெரியாத பல சுவையான தகவல்கள் இதில் கிடைக்கும் என்ற எதிர்பார்ப்பைக் கிளறிவிட்டிருக்கிறது இரவுக் கழுகு.
சோவியத்தில் வாட்டி வதக்கப்பட்ட போரிஸ் பாஸ்டர்நாக், ருஷ்யப் புரட்சியைப் பின்னணியாக வைத்து எழுதிய நாவல் ‘டாக்டர் ஷிவாகோ’ (Doctor Zhivago). ருஷ்ய இலக்கியத்தில் இந்த நாவல் ஒரு மைல்கல் என்கிறார்கள்.
‘டாக்டர் ஷிவாகோ’ ருஷ்ய மொழியில் வெளிவர சி.ஐ.ஏ. ரகசியமாக நிதி அளித்தது என்றும் பாஸ்டர்நாக் நோபல் பரிசு பெற சி.ஐ.ஏ. செய்த ஏற்பாடு அது என்றும் ஒருவர் புத்தகம் எழுதுகிறார்.
பாஸ்டர்நாக்கிற்கு 1958இல் நோபல் பரிசு அறிவிக்கப்பட்டது. பரிசைப் பெறுவதற்கு ருஷ்யாவை விட்டுச் செல்ல அவருக்கு அனுமதி மறுக்கப்பட்டது. அரசு நிர்ப்பந்தத்தால் பாஸ்டர்நாக் பரிசை நிராகரித்தார். ஆனால் நோபல் பரிசு அமைப்பு அதை ஏற்கவில்லை.
‘வாஷிங்டன் போஸ்ட்’டில் நீண்ட கட்டுரை.
ஆஸ்கர் பரிந்துரைப் பட்டியலில் இருக்கும் ‘த லாஸ்ட் கிங் ஆஃப் ஸ்காட்லண்ட்’, வெள்ளைக்காரர்களுக்காக வெள்ளைக்காரர்கள் எடுத்திருக்கும் கதை என்கிறார் ஒரு விமர்சகர் (படத்தை நான் பார்க்கவில்லை).
வெள்ளைக்காரர்கள் வெள்ளையரல்லாதவர்களிடம் இரக்கப்பட்டு அவர்களுக்காகப் போராடுவதாகக் காட்டும் படங்களைப் பட்டியலிடுகிறார் வனெசா வால்டர்ஸ் - To Kill a Mockingbird, A Time to Kill, Cry Freedom…
லாஸ்ட் கிங்கும் இந்த வகையில் ஒரு வெள்ளை மனிதநேயப் படம்தானே, அதை ஏன் யாருமே சுட்டிக்காட்டுவதில்லை என்று கேட்கிறார் வனெசா. பதில் தெரிந்து கேட்கப்படும் கேள்வி.
ஓட்டல் ருவாண்டா மாதிரி படங்களை எப்போதாவதுதான் பார்க்க முடிகிறது…